Isa 6 | NdeIBE | STEP | Ngomnyaka inkosi u-Uziya eyafa ngawo, ngabona uJehova ehlezi esihlalweni sobukhosi esiphezulu esiphakemeyo, injobo yesambatho sakhe igcwele ithempeli.

Isaiah 6

Ukuthunywa kuka-Isaya

1 Ngomnyaka inkosi u-Uziya eyafa ngawo, ngabona uJehova ehlezi esihlalweni sobukhosi esiphezulu esiphakemeyo, injobo yesambatho sakhe igcwele ithempeli.

2 Ngaphezu kwakhe kwakulamaserafi, elinye lelinye lilezimpiko eziyisithupha. Ayegubuzele ubuso bawo ngezimpiko ezimbili, egubuzele izinyawo zawo ngezimbili, ephapha ngezimbili.

3 Elinye lamemezela kwelinye lisithi: “Ungcwele, ungcwele, ungcwele uJehova uSomandla, Umhlaba wonke ugcwele inkazimulo yakhe.”

4 Ekuzwakaleni kwamazwi awo imigubazi lombundu kwanyikinyeka, kwathi ithempeli lagcwala intuthu. 5 Mina ngakhala ngathi, “Maye mina! Sengibhujisiwe! Ngoba ngingumuntu olezindebe ezingcolileyo, njalo ngihlala phakathi kwabantu abalezindebe ezingcolileyo, lamehlo ami asebone uJehova, uJehova uSomandla.”

6 Lapho-ke elinye lamaserafi laphaphela kimi liphethe ilahle elivuthayo esandleni salo elalilithathe ngodlawu e-alithareni. 7 Lathinta umlomo wami ngalo lathi, “Khangela, lokhu sekuthinte izindebe zakho; icala lakho selisusiwe, njalo lesono sakho sesihlawulelwe.”

8 Ngasengisizwa ilizwi likaJehova lisithi, “Ngizathuma bani na? Ngubani na ozasihambela?” Mina ngathi, “Ngilapha. Thuma mina!”

9 Wasesithi, “Hamba uyetshela abantu uthi: “ ‘Zwanini kokuphela, kodwa lingaqedisisi; bonani kokuphela, kodwa lingabonisisi.’

10 yenza inhliziyo yalababantu ibe lukhuni; wenze izindlebe zabo zibe buthundu, uvale amehlo abo. Hlezi babone ngamehlo abo, bezwe ngezindlebe zabo, baqedisise ngezinhliziyo zabo, baphenduke basiliswe.”

11 Ngasengisithi, “Koze kube nini, Jehova?” Yena waphendula wathi: “Amadolobho aze achitheke njalo kungaselabantu kuwo, izindlu zize zisale zingaselabantu, lamasimu ephundleke abhuquzeka,

12 uJehova aze axotshele umuntu wonke khatshana njalo ilizwe lidelwe ngokupheleleyo.

13 Lanxa ingxenye eyodwa etshumini isala elizweni izachithwa futhi. Kodwa njengezihlahla itherebhinti lom-okhi zitshisa izidindi lapho seziganyulwe, ngokunjalo inhlanyelo engcwele izakuba yisidindi elizweni.”